នាថ្ងៃទី០៣ ខែតុលា ឆ្នាំ២០២៦ សាកលវិទ្យាល័យឯកទេស នៃកម្ពុជា (CUS) សាខាខេត្តសៀមរាប បានរៀបចំវេទិកាប្រចាំឆ្នាំក្រោមប្រធានបទ «ការកសាងអាជីព និងការសិក្សាពេញមួយជីវិត» ដែលជាផ្នែកមួយនៃយន្តការពង្រឹងគុណភាពអប់រំ និងការសិក្សាស្រាវជ្រាវ។ កម្មវិធីនេះមានការចូលរួមពីនិស្សិតកំពុងសិក្សា និងនិស្សិតចុះឈ្មោះចូលរៀនថ្មីប្រមាណ ៣០០នាក់ ព្រមទាំងមានការរៀបចំពិព័រណ៍ខ្នាតតូចបង្ហាញពីផលិតផល និងសេវាកម្មរបស់អង្គភាពដៃគូសហការផងដែរ។

‎កិច្ចប្រជុំប្រចាំឆ្នាំ២០២៦ រវាងទីចាត់ការការងារព្រំដែន អគ្គបញ្ជាការដ្ឋាន នៃកងយោធពលខេមរភូមិន្ទ និងបញ្ជាការដ្ឋានកងទ័ពការពារព្រំដែន នៃក្រសួងការពារប្រទេសវៀតណាម ត្រូវបានធ្វើឡើងនៅខេត្តសៀមរាប នាថ្ងៃទី២ ខែតុលា ឆ្នាំ២០២៦ ដែលកិច្ចប្រជុំនេះដឹកនាំដោយលោកឧត្តមសេនីយ៍ទោ ស៊ិន សុខា នាយកទីចាត់ការការងារព្រំដែន អគ្គបញ្ជាការដ្ឋាន នៃកងយោធពលខេមរភូមិន្ទ និងលោកឧត្តមសេនីយ៍ ជិន ង៉ុកហ៊ូ មេបញ្ជាការរង បញ្ជាការដ្ឋានកងទ័ពការពារព្រំដែន ក្រសួងការពារប្រទេសវៀតណាម ធ្វើជាសហប្រធាន។

នាព្រឹកថ្ងៃទី៣ ខែតុលា ឆ្នាំ២០២៦ អាជ្ញាធរខេត្តសៀមរាប បានរៀបចំពិធីជួបសំណេះសំណាល និងពិភាក្សាការងារជាមួយអ្នកផលិតមាតិកាផ្សព្វផ្សាយ (Content Creators) និងតំណាងវិស័យឯកជនក្នុងខេត្តសៀមរាប ក្នុងគោលបំណងពង្រឹងកិច្ចសហប្រតិបត្តិការ និងជំរុញការចូលរួមផ្សព្វផ្សាយអំពីសក្តានុពល ភាពទាក់ទាញ និងការអភិវឌ្ឍរបស់ខេត្តឱ្យកាន់តែទូលំទូលាយ។

ឯកឧត្ដម ម៉ក់ សំភា សមាជិកក្រុមប្រឹក្សាខេត្ដសៀមរាប និងលោកស្រី ម៉ននី រង្សី អភិបាលរងខេត្ដ ព្រមទាំងមន្រ្ដីរាជការនៃរដ្ឋបាលខេត្ដសៀមរាប បានចូលរួមជាមួយពុទ្ធបរិស័ទកាន់បិណ្ឌវេនទី៧ នៅវត្ដពុទ្ធស្ថាននគររាជធម្មមេត្តា ស្ថិតក្នុងក្រុងសៀមរាប ខេត្ដសៀមរាប នារសៀលថ្ងៃទី២ ខែតុលា ឆ្នាំ២០២៦។

នៅព្រឹកថ្ងៃទី៣ ខែតុលា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ បណ្ឌិត ពេជ ចន្ទមុន្នី បានប្រគេនចង្ហាន់ បច្ច័យ និងទេយ្យវត្ថុផ្សេងៗ ដល់វត្តទាំង៩ ក្នុងតំបន់អង្គរ ខេត្តសៀមរាប ក្នុងឱកាសពិធីបុណ្យកាន់បិណ្ឌវេនទី៧ ដើម្បីឧទ្ទិសកុសលជូនដល់បុព្វបុរសខ្មែរសម័យអង្គរ វីរៈកងទ័ព ពលី ដើម្បីបុព្វហេតុការពារទឹកដី ជាតិ មាតុភូមិ និងញាតកាទាំង ៧សន្តាន និងដួងវិញ្ញាណក្ខន្ធអ្នកមានគុណដែលបានចែកឋានទៅ។

នារសៀលថ្ងៃទី២ ខែតុលា ឆ្នាំ២០២៦ ឯកឧត្ដម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានអញ្ជើញជួបសំណេះសំណាល និងតម្រង់ទិសការងារជូនដល់ថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្តសៀមរាប ដោយបានសង្កត់ធ្ងន់លើការលើកកម្ពស់សមត្ថភាពផ្នែកឌីជីថល ដើម្បីឆ្លើយតបទៅនឹងការវិវត្តនៃបច្ចេកវិទ្យាព័ត៌មានសម័យទំនើប។